Azərbaycan Qızıl Aypara Cəmiyyəti » Uncategorized

Azərbaycan Qızıl Aypara Cəmiyyəti və Fövqəladə Hallar Nazirliyi birgə taktiki-xüsusi təlim keçirmişdir

Ceyhun Məmmədzadə — Tue, 08 May 2018 13:46:43 +0000

8 may 2018-ci il tarixində Azərbaycan Respublikası Fövqəladə Hallar Nazirliyi və Azərbaycan Qızıl Aypara Cəmiyyəti (AzQAC) İsmayıllı rayonundakı Peşə Litseyində taktiki-xüsusi təlim keçirmişdir. Əvvəlcə İsmayıllı rayon icra hakimiyyətinin başçısı Mirdamət Sadıqov, Milli Məclisin deputatları Novruzəli Aslanov və Tahir Kərimli, Fövqəladə Hallar Nazirliyinin, Beynəlxalq Qızıl Xaç Komitəsinin nümayəndəliyinin üzvlərinin iştirakı ilə konfrans keçirilmişdir. Konfransda keçiriləcək təlim haqqında ətraflı məlumatlar verilmişdir. Tədbir “Təhlükəsiz və möhkəm icmaların qurulması” layihəsi (TMİQ) çərcivəsində, Fövqəladə Hallar Nazirliyi və AzQAC-ın arasında imzalanmış Əməkdaşlıq Memorandumu əsasında təşkil olunmuşdur. Təlimə, həmçinin, İsmayıllı Rayon İcra Hakimiyyətinin, Daxili İşlər və Səhiyyə nazirliklərinin qüvvə və vasitələri də cəlb olunmuşdur. Beynəlxalq Qızıl Xaç və Qızıl Aypara Hərəkatının yaranma günündə, eyni zamanda ulu öndər Heydər Əliyevin 95 illik yubileyi ərəfəsində,, Xalq Cümhuriyyətinin yaradılmasının 100 illik yubileyi münasibətilə təşkil olunmuş təlimin gedişində şərti olaraq zəlzələ nəticəsində yaranmış vəziyyətin qiymətləndirilməsi, yerli idarəetmə orqanları ilə qarşılıqlı fəaliyyətdə təhlükəli ərazilərdən insanların təxliyyəsi, axtarış-xilasetmə tədbirlərinin həyata keçirilməsi, yaralılara xəstəxanaya qədərki ilk yardımın təşkili və stress halına düşmüş insanlara ilk psixoloji yardımın göstərilməsi, ictimai asayişin qorunması, ümumiyyətlə fövqəladə hadisənin nəticələrinin aradan qaldırılması sahəsində birgə tədbirlər nümayiş etdirilmişdir.

Sonda təlimdə fəal iştirak edənlərə diplom və hədiyyələr təqdim olunmuşdur.

Qeyd edək ki, “Təhlükəsiz və möhkəm icmaların qurulması” layihəsi Azərbaycanın İsmayıllı və Qusar rayonlarında Avstriya İnkişaf və Əməkdaşlıq Agentliyi, Avstriya Qızıl Xaç Cəmiyyətinin maliyyə və texniki dəstəyi, İsmayıllı və Qusar rayonlarının İcra hakimiyyətləri və kənd bələdiyyələrinin dəstəyi, yerli icmaların fəal iştirakı ilə 2012-ci ildən etibarən uğurla həyata keçirilməkdədir.

Azərbaycan Qızıl Aypara Cəmiyyəti Nizami rayon bölməsi “Novruz” bayramını qeyd edir

Ceyhun Məmmədzadə — Tue, 27 Mar 2018 05:58:19 +0000

Azərbaycan Qızıl Aypara Cəmiyyəti Nizami rayon bölməsi həmişə olduğu kimi “Novruz”bayramında da qeydiyyatında olan 35 nəfər aztəminatlı ailələri,tənha insanları unutmadı.Nizami rayon bölməsinin sədri Rəna İbrahimova bayram münasibəti ilə onları təbrik edib,uzun ömür, can sağlığı arzulayıb.Adının hallandırılmasını istəməyən şəxs tərəfindən verilən “Novruz” sovqatı ehtiyacı olan insanlara paylanılıb.Yardım alan insanlar hər ay olduğu kimi “Novruz”bayramında da onları unutmayıb yardım edən xeyirxah insana və Nizami rayon bölməsinin sədri Rəna xanıma öz minnətdarlıqlarını bildiriblər.

Xeyriyyəçimiz qocaları unutmur

Ceyhun Məmmədzadə — Mon, 27 Nov 2017 13:24:28 +0000

Adının hallanmağını istəməyən xeyirxah insan tərəfindən Az QAC Sumqayıt şəhər bölməsinin qeydiyyatında olan 35 nəfər daha ehtiyaclı ahıla ərzaq yardımı paylanıldı. AZ QAC Sumqayıt şəhər bölməsinin sədri Mətanət Məhərrəmova öz adınan və humanitar yardım alan ehtiyaclı ahıllar adınan xeyrixah insana minnətdarlığını bildirmişdi.Ahıllar da öz növbələrində onlara diqqət və qayğı göstərən insana öz təşəkkürlərini göndərdilər..Bölməyə gəlmək iqtidarında olmayan yataq xəstələrinə yardımlar bölmənin işçi heyəti tərəfindən evlərində çatdırıldı.

8 May “Beynəlxalq Qızıl Xaç və Qızıl Aypara Hərəkatı” günüdür

Ceyhun Məmmədzadə — Mon, 08 May 2017 11:52:29 +0000

Beynəlxalq Qızıl Xaç və Qızıl Aypara Hərəkatı müstəqil, neytral və qərəzsiz bir hərəkatdır. Hərəkatın banisi Solferino dəhşətlərindən hədsiz təsirlənərək dünyanın diqqətini yardım cəmiyyətini yaratmağa yönəldən, yaralılara yardım və qayğı göstərilməsinə beynəlxalq səviyyədə razılığa gəlinməsinə nail olan Anri Dünandır (Henry Dunant). Hərəkatın 3 tərkib hissəsi var : Beynəlxalq Qızıl Xaç Komitəsi (BQXK), Milli Cəmiyyətlər və Beynəlxalq Qızıl Xaç və Qızıl Aypara Cəmiyyətləri Federasiyası. Hərəkatın əsasını qoyan orqan, silahlı münaqişələrdə neytral vasitəçi, Cenevrə Konvensiyalarının təsisçisi və hamisi Beynəlxalq Qızıl Xaç Komitəsidir.

Hərəkatın tərkib hissəsi kimi dünyada hal-hazırda 190 Milli Qızıl Xaç və Qızıl Aypara Cəmiyyətləri fəaliyyət göstərirlər. Milli Cəmiyyətlər ilk dəfə müharibə qurbanlarının əzablarını yüngülləşdirmək və yaralı əsgərləri sağaltmaq məqsədilə yaradılmışdır.

Bu əlamətdar gün münasibətilə Azərbaycan Qızıl Aypara Cəmiyyətinin təşkilatçılığı və Azərbaycan Texniki Universitetinin dəstəyi ilə universitetin akt zalında dəyirmi masa təşkil olundu.

Tədbiri giriş sözü ilə açan Azərbaycan Qızıl Aypara Cəmiyyətinin prezidenti, Milli Məclisin deputatı Novruz Aslanov AzQAC-ın gördüyü işlərdən, BQXK ilə münasibətlərindən söz açdı. Novruz müəllim çıxışında AzQAC-a dövlət dəstəyinin göstərilməsinin önəmindən danışdı.

Daha sonra söz BQXK-ın Azərbaycan Nümayəndəliyinin rəhbəri Elena Aymone Sesseraya verildi. Çıxışında xanım Elena BQXK-nın Azərbaycandakı fəaliyyətindən və AzQAC-la qarşıqlıqlı əməkdaşlıqlarından bəhs etdi.

Cəmiyyətin prezidenti Novruz Aslanov daha sonra ATU-nun rektor əvəzi, professor Xalıq Yahudova Cəmiyyətin humanitar missiyasının həyata keçirilməsində göstərdiyi dəstəyə görə fəxri fərman təqdim etdi. Professor çıxışında ona göstərilən diqqətə görə cənab Novruz Aslanova təşəkkürünü bildirdi. Həmçinin, ATU-nun AzQAC-la olan əməkdaşlığından, qarşılıqlı münasibətlərinin önəmindən bəhs etdi və gələcəkdə də əməkdaşlıq sahələrinin genişlənməsindən söz açdı.

Gənc tələbələrin də iştirak etdiyi tədbirdə onları Hərəkatla bağlı maraqlandıran suallar cavablandırıldı.

Tədbirin sonunda iştirakçılarla birlikdə xatirə şəkli çəkdirildi.

İslam və Beynəlxalq Humanitar Hüquqa dair 2-ci Beynəlxalq Konfrans

Ceyhun Məmmədzadə — Tue, 13 Dec 2016 11:09:14 +0000

7-9 Dekabr 2016-cı il tarixində Beynəlxalq Qızıl Xaç Komitəsi (BQXK) və İran Qızıl Aypara Cəmiyyəti İslam və Beynəlxalq Humanitar Hüququn Müasir Tədqiqatı İnstitutu ilə əməkdaşlıq şəraitində İran İslam Respublikasının Qum şəhərində İslam və Beynəlxalq Humanitar Hüquqa (BHH) dair 2-ci Beynəlxalq Konfrans təşkil etdilər. İslam və Beynəlxalq Humanitar Hüquqa dair 1-ci Beynəlxalq Konfrans ilk dəfə 10 il bundan öncə 2006-ci ildə İran İslam Respublikasının Qum şəhərində keçirilmişdir. Beləliklə, bu ilki Beynəlxalq Konfrans 10 illik dialoq təcrübəsi və dialoqun nəticələri üzərində qurulan bir mövzu ilə gündəmə gəldi. 2-ci Beynəlxalq Konfrans həmçinin İslam və Beynəlxalq Humanitar Hüququn ümumi humanitar dəyərlərinə dair humanitar və Müsəlman alimlər arasında mövcud olan dialoqun 10-cu ildönümünün qeyd edilməsi oldu.

Təkcə regiondakı insanlara deyil, regiondan kənardakı insanlara da təsir edən Yaxın Şərqdə hazırda baş verən insan iztirabları, dağıntılar və qütbləşmə nəzərə alınaraq 2-ci Beynəlxalq Konfrans çox mühüm bir vaxtda keçirilmişdir. Konfrans Beynəlxalq Humanitar Hüquq üzrə bir çox görkəmli ekspertləri, İslam alimləri və digər dini rəhbərləri, BQXK nümayəndələri, dünyanın iyirmidən artıq ölkəsindən olan Milli Qızıl Aypara Cəmiyyətləri nümayəndələrini bir araya topladı.

İslam və Beynəlxalq Humanitar Hüquqa dair 2-ci Beynəlxalq Konfransın rəsmi açılış mərasimi 7 Dekabr tarixində BQXK-nin Prezidenti cənab Piter Maurer, İran Qızıl Aypara Cəmiyyətinin Prezidenti Doktor Ziai, İran İslam Respublikasının Xarici İşlər Nazirinin müavini Doktor Abbas Arağçi, İran İslam Respublikasının Müdafiə Nazirinin müavini general Nəsrulah Kələntarinin iştirakı ilə keçirildi. Açılış nitqi ilə çıxış edən BQXK-nin Prezidenti cənab Maurer İslam və Beynəlxalq Humanitar Hüquqdakı ümumi humanitar dəyərlərə dair Dialoqun 10-cu ildönümünü yekun nəticə və gələcəyə baxış adlandırdı.

Konfransın ikinci günü panel müzakirələrinə həsr olunmuşdu. Panel müzakirələri İslam yurisprudensiyası və Beynəlxalq Humanitar Hüquq ekspertlərinə İslam və Beynəlxalq Humanitar Hüquqdakı mövcud ümumi humanitar dəyərləri birlikdə nəzərdən keçirmək və yada salmaq, habelə dini, hüquqi və humanitar məsələləri bütün mədəniyyətlərin başa düşdüyü bir dildə müzakirə etmək imkanı vermişdir. Müzakirələrin əsas mövzuları aşağıdakılar olmuşdur: dünya dinlərindəki ümumi humanitar dəyərlər, İslam yurisprudensiyası nöqteyi nəzərindən mülki insanların, ölmüş, itkin düşmüş şəxslərin, məcburi köçkünlər və qaçqınlar kimi qrupların müdafiəsi, İslam yurisprudensiyası nöqteyi nəzərindən ətraf mühitin və təbii resursların qorunması.

9 Dekabr 2016-cı il tarixində BQXK-nin İrandakı nümayəndəliyi və İran Qızıl Aypara Cəmiyyəti BQXK-nin nümayəndələri və Milli Qızıl Aypara Cəmiyyətlərinin təmsilçiləri üçün açıq müzakirələr keçirməyə, İslam və BHH dair fikir mübadiləsi etməyə imkan verən dəyirmi masa diskussiyası təşkil etdi.

Azərbaycan Qızıl Aypara Cəmiyyətini 2-ci Beynəlxalq Konfransda və dəyirmi masa arxasında keçirilən müzakirələrdə Az.QAC-nin Beynəlxalq Əlaqələr şöbəsinin əməkdaşları Nailə Ömərova və Nigar Rüstəmzadə təmsil etmişlər.

BQX/QA Cəmiyyətləri Federasiyasının və Beynəlxalq Qızıl Xaç Komitəsinin nümayəndələri AzQAC-ın Katibliyində olmuşlar

Ceyhun Məmmədzadə — Mon, 01 Aug 2016 12:17:42 +0000

AzQAC-ın prezidenti cənab Novruz Aslanov BQX/QA Cəmiyyətləri Federasiyasının klaster ölkələri (orta Asiya, Türkiyə, Şərqi Avropa) üzrə başçısı Elxan Rəhimovu, BQX/QA Cəmiyyətləri Federasiyanın Tacikistan, Qazaxıstan və Qırğızıstan üzrə nümayəndəliyinin rəhbəri Bəylər Talıbovu və BQXK-nin Cənubi Sudanda əməkdaşlıq üzrə nümayəndəsi Bayram Vəliyevi AzQAC-ın baş ofisində qəbul etmişdir.

Görüş zamanı AzQAC-la istər Beynəlxalq Federasiya, istərsə də Beynəlxalq Qızıl Xaç Komitəsi arasındakı münasibətlərdən söhbət açılmışdr. Gələcəkdə Strateji Planın həyata keçirilməsi sahəsində qarşılıqlı əməkdaşlığın daha da inkişaf etdirilməsi müzakirə edilmişdir. Həmçinin, AzQAC-ın humanitar sahədə beynəlxalq arenada son zamanlar qazandığı çoxsaylı uğurlardan da söz açılmışdır.

Dostluq şəraitində keçən görüşdə xoş arzular ifadə olunmuşdur.

“Ehtiyacın varsa al, ehtiyacın yoxsa əl tut!” kampaniyası adı altında xeyirxah aksiya keçirildi

Ceyhun Məmmədzadə — Mon, 18 Jan 2016 07:34:40 +0000

Azərbaycan Qızıl Aypara Cəmiyyətinin Gənclər və Könüllülər şöbəsinin 2011-2015-ci il strateji planının əsas məqsədi Gənclər və Könüllülərin idarəetmə sisteminin inkişaf etdirilməsi və bununla da sosial cəhətdən zəif müdafiə olunan və qayğıya ehtiyacı olan əhaliyə könüllü xidmətin səmərəliyinin artırılmasından ibarətdir.

Bununla əlaqədar olaraq, Azərbaycan Qızıl Aypara Cəmiyyətinin Gənclər Komitəsi, Gənclər və könüllülər şöbəsi, AzQAC Sabunçu rayon bölməsinin birgə təşkilatçılığı ilə Sabunçu rayonunda evlərdə yaşayan gənc əlil ailələrinə və Qızıl Aypara Cəmiyyətinin sosial cəhətdən çox zəif olan könüllülərin ailələrinə “Ehtiyacın varsa al, ehtiyacın yoxsa əl tut!” kampaniyası adı altında tədbir keçirildi. Bu kampaniyaya dəstək olaraq, adının çəkilməsini istəməyən iş adamı ehtiyacı olan bu insanlara ət payı və cürbəcür şirniyyatlarla humanitar yardım etmişdir.

Tədbir 15 yanvar 2016-cı il tarixində Sabunçu rayon bölməsində baş tutmuşdur.

Sonda tədbirdə iştirak edən gənc əlillərin ailələri və könüllülər tədbirin ərsəyə gəlməsində Qızıl Aypara Cəmiyyətinin rəhbərliyinə, əməkdaşlarına və könüllülərinə, humanitar yardımı edən həmin şəxsə, AzQAC Sabunçu rayon bölməsinin rəhbərliyinə və könüllülərinə keçirdikləri bu tədbir üçün öz təşəkkürlərini bildirdilər. Biz də Cəmiyyət olaraq tədbirdə əməyi keçən hər bir kəsə öz təşəkkürümüzü bildiririk