2021-ci il 27-28-29 aprel tarixlərində Bərdə, Füzuli və Cocuqmərcanlıda BQXK-nın dəstəyi və AzQAC-ın təşkilatçılığı ilə könüllülərə seminarlar təşkil edildi. Seminarın məqsədi könüllülərin bilik və bacarıqlarının artırılması olmuşdur. Seminarda AzQAC-ın Bərdə, Füzuli və Cəbrayıl rayon bölmələrinin könüllüləri Beynəlxalq Qızıl Xaç və Qızıl Aypara Hərəkatının yaranma tarixi, tərkib hissələri və  fundamental prinsiplər haqqında məlumatlar əldə etdilər. Həmçinin, AzQAC-ın yaranma tarixi, fəaliyyət istiqamətləri, həyata keçirdiyi layihələr və informasiya, komunikasiya və sosial media siyasəti haqqında ətraflı məlumatlandırıldılar. Qızıl Xaç və Qızıl Aypara emblemlərindən istifadə və onların müdafiəsi, onlardan sui-istifadə hallarının qarşısının alınması haqqında təqdimatlar nümayiş etdirildi. Könüllülərə qrup məşğələləri təşkil edildi. Fəaliyyətləri əks etdirən video çarxlar göstərildi.