Hər il olduğu kimi bu ildə Azərbaycan Qızıl Aypara Cəmiyyəti Sumqayıt şəhər bölməsi 1 iyun Uşaqların Beynəlxalq Müdafiəsi günü ilə bağlı ənənəsini davam etdirərək tədbir təşkil etdi. Bu ilki tədbir Sumqayıt şəhərində yerləşən Laçın rayon təhsil şöbəsi 5 saylı tam orta məktəbdə qeyd olundu. Məktəbin direktoru Əlipolad Əzizov ayparaçıları salamlayaraq, məhz bu məktəbi seçdiyimiz üçün öz təşəkkürünü bildirdi. AzQAC Sumqayıt şəhər bölmə sədri Mətanət Məhərrəmova uşaqları bayram münasibəti ilə təbrik edərək, ən xoş arzularını bildirdi. 44 günlük müharibədə Ali Baş Komandan İlham Əliyev cənablarının rəhbərliyi ilə 30 ilə yaxın işğal altında olan torpaqlarımızın geri qaytarılmasında canını fəda edən Şəhidlərimizi bir dəqiqəlik sükutla yad etməyi xatırlatdı. O, yaxın vaxtlarda belə tədbirlərin Laçında və digər azad olunmuş topaqlarımızda keçirilməsini arzu etdi. Sonra bir-birini əvəz edən musiqi sədaları altında könüllülər uşaqlarla rəqs edib, əyləndilər. Kiçik yaşlı hazırlıq qrupunu bitirən uşaqlar şeirləri ilə tədbirə rəng qatdılar. Sonda AzQAC Sumqayıt şəhər bölməsinin hazırladığı hədiyyələr uşaqlara təqdim olundu və xatirə şəkilləri çəkildi.
