11-13 oktyabr 2022-ci il tarixlərində, Azərbaycan Qızıl Aypara Cəmiyyətinin (AzQAC) Gədəbəy, Tovuz və Qazax rayon bölmələrinin könüllüləri üçün “Beynəlxalq Qızıl Xaç və Qızıl Aypara Hərəkatı haqqında Əsas Tanışlıq Kursu” keçirilib. Bu kurs bölməyə yeni qoşulan könüllülər üçün təşkil edilən müntəzəm kursdur və ildə bir neçə dəfə təşkil olunur. Kursun əsas məqsədi Beynəlxalq Qızıl Xaç və Qızıl Aypara Hərəkatının missiyasını, komponentlərini və əsas prinsiplərini daha yaxşı başa düşmək və Azərbaycan Qızıl Aypara Cəmiyyətini ictimaiyyətdə layiqincə təmsil etmək üçün könüllülər arasında Qızıl Xaç və Qızıl Aypara Hərəkatı haqqında bilikləri yaymaqdır.
Kurs zamanı könüllülərə Beynəlxalq Qızıl Xaç və Qızıl Aypara Hərəkatının tarixi, Hərəkatın tərkib hissələri, Hərəkatın əsas prinsipləri, humanizm emblemləri və Azərbaycan Qızıl Aypara Cəmiyyətinin fəaliyyətləri baradə ətraflı məlumat verilib.
Kurs Azərbaycan Qızıl Aypara Cəmiyyətinin İnformasiya və İctimaiyyətlə Əlaqalər şöbəsinin müdiri Nigar Rüstəmzadə, AzQAC-ın təcrübəli könüllüsü Fərid Nağızadə, Beynəlxalq Qızıl Xaç Komitəsinin Əməkdaşlıq şöbəsinin məsul əməkdaşları Rasim Allazov və Sevil Süleymanova tərəfindən həyata keçirilib.
Kursda AzQAC-ın Gədəbəy, Tovuz və Qazax rayon bölmələrindən ümumilikdə 46 könüllü iştirak edib.
