Azərbaycan Qızıl Aypara Cəmiyyətinin Laçın rayon bölməsi müqəddəs Qurban bayramı münasibəti ilə öz iş və tədbirlər planına uyğun olaraq avqust ayının 23-də rayon bölməsində növbəti xeyriyyə tədbiri keçirmişdir. Tədbirə rayon bölməsində imtiyazlı təbəqədən qeydiyyatda olan 15 nəfər ahıl yaşlı tənha, kimsəsiz və birinci qrup əlillər, gələ bilməyənlər əvəzinə isə yaxınları dəvət olunmuşlar. Rayon bölməsinin sədri Əli Hüseynov iştirakçıları müqəddəs Qurban bayramı münasibəti ilə təbrik etmiş, qurbanlarının və etdikləri duaların qəbul olunmasını, süfrələrinin ruzulu və bərəkətli olmasını arzu etmişdir.
Tədbirin təşkilində yaxından iştirak edən rayonun axundu Hacı Əsgər də tədbir iştirakçılarını əziz bayramla əlaqədar təbrik etməklə yanaşı bayramın yaranma tarixi, mahiyyəti haqqında danışaraq, bu bayramın müsəlmanlar arasında həmrəylik, mənəvi birlik bayramı olduğunu qeyd etmişdir.
Tədbirə dəvət olunanlar tədbirin təşkilatçılarına öz minnətdarlıqlarını bildirmişlər və növbəti qurbanların hələ də işğal altında olan doğma Laçınımızda kəsilməsini xüsusi vurğulamışlar.
Tədbirin sonunda tədbir iştirakçılarına “qurban əti” payları və ərzaq bağlamaları paylanmışdır.
