Azərbaycan Qızıl Aypara Cəmiyyətinin müraciəti əsasında Türkiyə Qızıl Ay Cəmiyyətinin növbəti 11 yük maşınından (TIR) ibarət humanitar karvanı Azərbaycana doğru yola çıxmışdır. Məqsəd Ermənistan silahlı qüvvələri tərəfindən Azərbaycan bölgələrinə olan hücum nəticəsində zərərçəkən mülki əhaliyə humanitar yardım göstərməkdir.
Beynəlxalq Qızıl Xaç və Qızıl Aypara Cəmiyyətləri (BQX/QAC) Federasiyasının Avropa zonası üzrə vitse-prezidenti, Türkiyə Qızıl Ay Cəmiyyətinin prezidenti Kərəm Kınık Türkiyədə “Qardaşlara kömək etmək vaxtıdır-Göstər qardaşlığını, Türkiyə” adı ilə kampaniya başlatmışdır. Kampaniya çərçivəsində qardaş Türkiyə xalqından cəbhəyanı ərazilərdə zərərçəkən və həlak olan insanların ailələrinə zəruri humanitar yardımlar toplanılaraq Azərbaycana göndərilmişdir.
Məlumat üçün bildiririk ki, daha öncə də zəruri ehtiyaclara uyğun olaraq 8 tırlıq humanitar yük AzQAC-a təhvil verilmişdir. Göndərilən humanitar yük AzQAC-ın xətti ilə cəbhəyanı ərazilərdə zərərçəkən mülki şəxslərə paylanılmışdır.
