Beynəlxalq Qızıl Xaç və Qızıl Aypara Cəmiyyətləri Federasiyasının XXIII Baş Assambleyası davam edir

19 İyun 2022-ci il tarixində İsveçrənin Cenevrə şəhərində Beynəlxalq Federasiyanın XXIII Baş Assambleyası öz fəaliyyətinə başladı. Beynəlxalq Federasiyaya üzv olan 192 Milli Qızıl Xaç Qızıl Aypara Cəmiyyətlərinin iştirak etdiyi Baş Assambleyada Beynəlxalq Federasiyanın yeni prezidenti, vitse-prezidentləri və İdarətemə Şurasının üzvlərinin seçkiləri keçirildi. Qeyd edək ki, Beynəlxalq Federasiyanın prezidentliyinə Türkiyə QAC və İtaliya QXC prezidentləri öz namizədliklərini irəli sürmüşdülər. 192 Milli QXQA Cəmiyyətlərinin iştirak etdiyi səsvərmə nəticəsində İtaliya Qızıl Xaçının Prezidenti Francesco Rocco yenidən Beynəlxalq Federasiyanın prezidenti seçildi.

Vitse-prezident vəzifələrinə isə Avropa regionundan Gürcüstan QXC-nin prezidenti Natia Loladze, Amerika regionundan Venezuela QXC-nin vitse-prezidenti, Miguel Villarroel Sierraalta, Asiya regionundan Küveyt MC-nin icraçı katibi Maha Barjas Al-Barjas və Afrika regionundan Qambiya QXC-nin icraçı katibi Alasan Senghore seçildilər.

Azərbaycan Qızıl Aypara Cəmiyyəti XXIII Baş Assambleyada Milli Cəmiyyətin prezidenti Novruz Aslanov, Milli Cəmiyyətin icraçı katibi Ceyhun Mirzəyev və gənc nümayəndə Nigar Rüstəmzadədən ibarət olan nümayəndə heyəti ilə təmsil olunur. AzQAC-nin prezidenti Novruz Aslanov prezidenti və vitse-prezidentləri təbrik etdi və onlara bu şərəfli humanitar missiyalarında uğurlar arzuladı.

18 və 19 İyun 2022-ci il tarixlərində Azərbaycan Qızıl Aypara Cəmiyyətinin prezidenti Novruz Aslanov bir sıra Milli QXQA Cəmiyyətlərinin prezidentləri ilə görüşlər keçirib müzakirələr apardı.