Bu gün Azərbaycan Qızıl Aypara Cəmiyyəti (AzQAC)  olaraq çox üzücü bir xəbər aldıq. Azərbaycan Qızıl Aypara Cəmiyyəti prezidentinin müşaviri, idarəetmə şurasının üzvü Nazim Məcidov dünyasını dəyişdi. Azərbaycan Qızıl Aypara Cəmiyyətinin, çoxsaylı üzvləri, könüllüləri  və kollektivi adından mərhumun ailəsinə və yaxınlarına dərin hüznlə başsağlığı veririk.

Nazim Məcidov Azərbaycan Qızıl Aypara Cəmiyyətinin İdarəetmə Şurasının üzvü (22 il), Azərbaycan Qızıl Aypara Cəmiyyətinin prezidentinin müşaviri, Tibbi üzrə fəlsəfə doktoru ömrünün 62-ci ilində vəfat etmiş, haqq dünyasına qovuşmuşdur.

N.Məcidov müxtəlif illərdə ayrı-ayrı tibb müəssisələrində  rəhbər vəzifələrdə çalışmışdır.

Uzun müddət Bakı Bulvar İdarəsinin rəis müavini vəzifəsində işləmiş, Bulvarın inkişafına öz töhfəsini vermişdir. “Bakı bulvarı” haqqında yazılmış ilk mahnının mətininin müəllifi olmuşdur.

N.Məcidov daim xeyirxahlığı, alicənablığı, sadəliyi, səmimiliyi ilə seçilmişdir. Dəyərli ziyalı, alim, həkim, ictimai xadim kimi daim fərqlənmişdir.  Sədaqətli, etibarlı dost kimi, mehriban, sevimli ailə başçısı kimi də nümunəvi olmuşdur.

22 il ərzində Beynəlxalq Qızıl Xaç və Qızıl Aypara  Hərəkatının, eləcə də Azərbaycan Qızıl Aypara Cəmiyyətinin inkişafına öz əməli töhfəsini vermişdir.

Səmərəli fəaliyyətinə görə o, respublika rəhbərliyi, eləcə də Azərbaycan Qızıl Ayapara Cəmiyyəti tərəfindən yüksək mükafatlara layiq görülmüşdür.

Bu nurlu şəxsiyyətin parlaq xatirəsi daim onu tanıyanların qəlbində əbədi yaşayacaqdır.

Ruhu şad olsun. Allah rəhmət eləsin.