19-20 sentyabr tarixlərində Bərdə rayonunda Fövqəladə Mobil Könüllü Dəstələrin (FMKD) üzvləri üçün “Mənim haqqımda kitab” təlimi təşkil olundu. “Mənim haqqımda kitab” – 2010-cu ildə İsveç Qızıl Xaç Cəmiyyəti tərəfindən hazırlanmış alətlər dəstidir. Kitab silahlı münaqişə və digər zorakılıqlardan təsirlənən uşaqların ehtiyaclarını ödəmək üçün uyğunlaşdırılmışdır. Təlimin əsas məqsədi könüllülərə stressin uşaqlara təsirləri barədə məlumat vermək, ən əsası isə onlara kitabla işləməyi öyrətməkdir ki, uşaqların psixoloji durumunu yaxşılaşdırmaq üçün məktəblərdə sessiyalar keçirə bilsinlər.
Təlim Beynəlxalq Qızıl Xaç Komitəsinin dəstəyi ilə Azərbaycan Qızıl Aypara Cəmiyyətinin psixoloqu Nigar Qədəşova tərəfindən keçirilmişdir. Milli Cəmiyyətin Ağdam, Bərdə, Füzuli, Tərtər və Tovuz rayon bölmələrindən olan könüllülərin iştitakı ilə təşkil olunmuş təlim sonrası könüllülərin məktəb şagirdləri ilə fəaliyyətləri nəzərdə tutulub.
