1 mart 2023-cü il tarixində Bakı Texniki Kollecində Azərbaycan Qızıl Aypara Cəmiyyətinin 103-cü ili münasibətilə qanvermə aksiyası keçirilib. Ənənəvi olaraq, Azərbaycan Qızıl Aypara Cəmiyyəti əməkdaşlıq çərçivəsində müəssisə və təhsil ocaqlarında Mərkəzi Qan Bankının iştirakı və dəstəyi ilə kütləvi qanvermə aksiyalarının təşkilini mütəmadi olaraq həyata keçirir.
Aksiyada Azərbaycan Qızıl Aypara Cəmiyyətinin rəhbər heyəti, əməkdaşları, Türk Qızıl Ay-ın Azərbaycan üzrə təmsilçisi, Bakı Texniki Kollecinin rəhbərliyi və eyni zamanda ictimaiyyətin nümayəndələri iştirak edib.
Azərbaycan Qızıl Aypara Cəmiyyətinin vitse-prezidenti Qafar Əsgərzadə tədbir iştirakçılarını salamlayaraq, Cəmiyyətin qan donorluğu və humanitar sahədə həyata keçirdiyi fəaliyyətlər barədə çıxış edib. Aksiyanın qana ehtiyacı olan insanlara dəstək, məqsəd və məramını qeyd edərək, bu xeyirxah addımlarına görə qan donorlarına minnətdarlığını bildirib. Bundan sonra da bu formada qanvermə aksiyalarının keçiriləcəyini vurğulayıb.
Daha sonra Bakı Texniki Kollecinin direktoru Akif Cahangirov da tədbir iştirakçılarını salamladı və bu önəmli günə diqqət ayırıb gələnlərə öz minnətdarlığını bildirib. Akif Cahangirov qanvermənin vacibliyindən danışaraq, bu qəbildən olan aksiyaların önəmliliyinə vurğu edərək, gələcəkdə də qarşılıqlı əməkdaşlıq çərçivəsində belə aksiyaların təkrarlanacığını qeyd edib.
Türk Qızıl Ayının Azərbaycan üzrə nümayəndəsi Mustafa Süngər də öz növbəsində fikirlərini dilə gətirib. Qanvermənin önəmliliyindən danışan Mustafa Süngər, Türkiyədə baş vermiş zəlzələyə görə Azərbaycanın ilk dəqiqələrdən olan dəstəyini vurğulayıb və minnətdarlığını bildirib.
