“Azərikimya” İstehsalat Birliyində ümummilli lider Heydər Əliyevin anadan olmasının 93-cü ildönümünə həsr olunan şahmat turniri keçirilib.
Sumqayıtda fəaliyyət göstərən idarə və müəssisələrin kollektivləri arasında qarşılıqlı faydalı əməkdaşlığın yaradılmasına, əlaqələrin genişləndirilməsinə və səmimi münasibətlərin formalaşdırılmasına xidmət edən turnirində «Azərikimya» İB-nin idarə aparatını, Qızıl Aypara Cəmiyyətinin Sumqayıt şəhər bölməsini, Etilen-polietilen zavodunu, Təmir-tikinti İdarəsini, Sumqayıt Dövlət Universitetini, Karbamid zavodunu, Sumqayıt şəhər Dövlət Yanğından Mühafizə Xidmətini, şəhər Təhsil və Səhiyyə şöbələrini, Qaz-istismar İdarəsini, YAP Sumqayıt şəhər təşkilatını, Corat və Hacı Zeynalabdin Tağıyev qəsəbə bələdiyyələrini, şəhər Rabitə qovşağını və digər qurumları təmsil edən 50-dən artıq həvəskar şahmatçı gücünü sınamışdır.
Turnirin açılış mərasimində çıxış edən “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev yarış iştirakçılarını salamlamış, onlara uğurlar və qələbə sevinci arzulamışdır.
FİDE-nin qaydalarına uyğun, İsveçrə sistemi ilə və təcrübəli şahmat hakimlərinin nəzarəti altında iki gün davam edən yarışlarda QAC Sumqayıt bölməsinin könüllüləri fəal şəkildə iştirak etmişdilər.
Qaliblərə xüsusi diplomlar və mükafatlar təqdim olunmuşdur. Turnirin bağlanış mərasimində iştirak edən şahmat üzrə beynəlxalq dərəcəliqrossmeyster, Dünya və Avropa birinciliklərinin qızıl mükafatçısı Zeynəb Məmmədyarova qalibləri təbrik etmiş, onlara yeni nailiyyətlər arzulamışdır.
