16 may 2016-cı il tarixdə Azərbaycan Qızıl Aypara Cəmiyyətinin Baş Qərargahında Cəmiyyətin prezidenti, millət vəkili Novruz Aslanovla Beynəlxalq Qızıl Xaç Komitəsinin (BQXK) Bakı Ofisinin başçısı xanım Elena Ajmone Sessera arasında növbəti işgüzar görüş keçirilmişdir. Görüşdə eyni zamanda BQXK-nın Regional Əməkdaşlıq üzrə nümayəndəsi Qreqori Le Coq, Əməkdaşlıq üzrə məsul şəxsi Rasim Allazov və hüquq məsləhətçisi Jalə Əzizova da iştirak etmişlər.
Görüş zamanı BQXK-ın və AzQAC-ın öz missiyaları və mandatları çərçivəsində atdıqları addımlar və humanitar fəaliyyətlər müzakirə olunmuşdur. Milli Cəmiyyətin prezidenti cənab Novruz Aslanov və BQXK-nın Bakı Ofisinin başçısı xanım Elena Ajmone Sessera AzQAC ilə BQXK-nın Bakı Ofisi və Bərdədə yerləşən yarım-nümayəndəliyi arasında əməkdaşlıq çərçivəsində koordinasiya olunmuş münasibətləri yüksək qiymətləndirərək onların humanitar fəaliyyətlərə müsbət təsir etdiyini bildirmişlər. Bu baxımdan, humanitar tədbirlərin və humanitar faəliyyətlərin bundan sonra da uğurla və daha səmərəli şəkildə həyata keçirilməsi üçün hər iki təşkilat arasında qurulmuş əməkdaşlıq münasibətlərinin koordinasiya əsasında qurulmasının vacibliyi vurğulanmışdır. Həmçinin humanitar layihələrin həyata keçirilməsi məqsədilə donorların dəstəyinin vacibliyi, Azərbaycanda humanitar sahənin inkişafına dövlət tərəfindən göstərilən diqqət və qayğı, yerli və beynəlxalq səviyyədə qarşılıqlı əməkdaşlığın səmərəliliyi müzakirə mövzusu olmuşdur.
Sonda tərəflər mövcud şəraitdə əməkdaşlıq çərçivəsində həyata keçirəcəkləri fəaliyyətlər və atılması lazım olan addımlar barədə geniş fikir mübadiləsi aparmışlar.
