Hər bir ölkədə olduğu kimi, Azərbaycanda da miqrasiya  ilə bağlı olan problemlər daimi gündəmdədir. Azərbaycan Qızıl Aypara Cəmiyyətinin ölkədə yaşayan xarici məcburi köçkün və əmək miqrantlarının ehtiyaclarını, onların yaşayış imkanlarını qiymətləndirmək  məqsədilə mütəmadi olaraq onlarla görüşüb sorğular aparılması bir ən-ənə halını almışdır. Cəmiyyət tərəfindən təmənnasız olaraq təşkil olunmuş  Azərbaycan dili kursunun miqrant müdavimləri bu fəaliyyətin əsas hədəf obyektidirlər.

Noyabr ayı Uşaq hüquqlarının müdafiəsi ayı olduğu üçün AzQAC  əməkdaşları yerlərdə bu münasibətilə görüşlər keçirir, uşaqlar üçün maraqlı tədbirlər həyata keçirirlər. Belə tədbirlərdən biri  də bu günlərdə İcmada Sağlamlıq və qayğı layihəsinin koordinatoru Mətanət Qaraxanova və Miqrasiya şöbəsinin əməkdaşı, migrantlara azərbaycan dili müəllimi Sona Hacıyevanın ehtiyacı olan, 6 nəfərlik (4-ü uşaq)  bir əfqan ailəsi ilə evində  planlaşdırdıqları növbəti görüş oldu. AzQAC-ın humanitar ərzaq bağlaması ilə Yaqubilər ailəsini sevindirən ayparaçılar öz gəlişləri, söhbətləri və məsləhətləri ilə onların sıxıntılarına, problemlərinə azacıq da olsa dəstək olmağa və onların arzu və istəklərini öyrənməyə çalışmışlar.

Təşəbbüskar Ayparaçılar Sona Hacıyeva və Mətanət Qaraxanova onlarla xeyli vaxt keçirdilər,ailənin kiçik oğlu Mehdi Yaqubinin ad gününü sürpriz olaraq qış gödəkçəsi və papaqla təbrik etdilər. Bu gözlənilməz addıma görə Mehdi və ailəsi öz təşəkkürlərini etdilər. Sonra uşaqlar və ayparaçılar Azərbaycan Qızıl Ayparasının himnini birlikdə oxudular. Yekunda Sona Hacıyeva və Mətanət Qaraxanova  bir sıra problemlərin yüngülləşdirilməsi yolunda dəstək olmaq üçün çalışacaqlarını söylədilər və onlara dözüm və çətinliklərlə mübarizə əzmi, uşaqlara çox çalışmağı və yaxşı təhsil almağı arzuladılar.