Azərbaycan Qızıl Aypara Cəmiyyəti ilə Fövqəladə Hallar Nazirliyi arasında 2006-cı ildə bağlanmış Anlaşma Memorandumuna əsasən, respublikada baş vermiş fövqəladə hallar zamanı baş verə biləcək fəsadların, zərərin aradan qaldırılmasında, zərərçəkmişlərə vaxtında ilk yardım göstərilməsində, əhali arasında fəal iştirak edir.
Ənənəvi olaraq, 2003-cü ildən bü günə kimi hər il sentyabr ayının 2-ci şənbə günü dünyada, eləcə də, respublikamızda “Ümumdünya İlk Yardım günü” qeyd olunur. Dünyanın 190 ölkəsində “İlk Yardım günü” qəzalar və ani xəstəliklər vəziyyətində tibbi yardım gələnə qədər zərərçəkmişlərə edilə biləcək ilk yardım tətbiqləri haqqında cəmiyyətin maarifləndirməsi üçün tədbirlər həyata keçirilir. Fövqəladə hallar və təbii fəlakətlər zamanı zərəri minimuma endirməyi qarşısına məqsəd qoyan AzQAC bu məqsədlə ilk yardım seminarları təşkil edir. AzQAC hər il bu günü müxtəlif təhsil ocaqlarında, hərbi hissələrdə, sərhəd bölgələrində və eləcə də, insanların toplaşdığı parklarda ilk yardım vərdişlərini aşılamaq məqsədilə, silsilə tədbirlər həyata keçirir.
Bu gün AzQAC-ın və FHN-nin Mülkü Müdafiə Qoşunlarının birgə təşkilatçılığı ilə ilk yardım tədbiri keçirildi. Tədbirin keçirilmə məqsədi ictimaiyyətə ilk yardım vərdişlərini aşılamaqdır.
Tədbiri giriş sözü ilə açan AzQAC-ın vitse-prezidenti Qafar Əsgərzadə Cəmiyyətin prezidenti, Milli Məclisin deputatı Novruz Aslanovun salamlarını əsgər və zabit heyətinə çatdırdı. Mülkü Müdafiə Qoşunlarının rəhbər şəxslərinin də iştirak etdiyi tədbirdə vitse-prezident AzQAC-ın yaranma tarixi, fəaliyyət istiqamətləri, həyata keçirdiyi layihələr haqqında məlumat verdi. Natiq çıxışında ilk yardımın önəmindən bəhs edərək, insan həyatının tibbi xidmət gələnə kimi xilas edilməsindəki rolundan bəhs etdi. Tədbirin təşkilindəki dəstəyinə görə şəxsən Fövqəladə Hallar Naziri general-polkovnik Kəmaləddin Heydərova öz dərin təşəkkürlərini bildirdi.
Daha sonra AzQAC-ın könüllülərinin iştirakı ilə ilk yardım çadırı qurulardu. İştirakçılara əyani olaraq ilk yardım vərdişləri nümayiş etdirildi.
Tədbirdə AzQAC-ın və FHN-nin rəhbər və digər vəzifəli şəxsləri, Beynəlxalq Qızıl Xaç Komitəsinin təmsilçiləri, könüllülər və rayon ictimaiyyəti iştirak edirdilər.
Sonda iştirakçılarla birlikdə xatirə şəkli çəkdirildi.
