2020-ci il fevralın 28-də AzQAC-ın Baş ofisində keçirilən tədbirdə Cəmiyyətin Regional Mərkəz Koordinatorları “Yubiley Medalı” medalı ilə təltif olundular. Tədbiri giriş sözü ilə açan AzQAC-ın prezidenti cənab Novruz Aslanov 100 illik şanlı tarixə malik olan Cəmiyyətin qazandığı uğurlardan bəhs etdi. Bu uğurların əldə edilməsində AzQAC-ın şəhər və rayon bölmə sədrlərinin də xüsusi əməklərinin olduğunu qeyd etdi. Artıq uzun illərdir bir yerdə çalışdıqları ayparaçıların AzQAC-ı daha da inkişaf etmiş bir Milli Cəmiyyətə çevirdiklərini söylədi. AzQAC-ın qarşıdan gələn 100 İllik Yubiley tədbirinə hazırlıqların yüksək sürətlə davam etdiyini söylədi.
Daha sonra təltif edilmə mərasiminə keçildi. Cəmiyyətin prezidenti təltif edilən hər bir Regional Mərkəz Koordinatoruna AzQAC-ın işçi heyəti, çoxsaylı üzvləri və könüllüləri adından öz təşəkkürlərini bildirdi.
Təltif edilən Koordinatorlar Mustafayev Almirzə, İbrahimova Rəna, Muradlı Vilayət, Miriyev Zəfər və Kəlbəcər rayon bölmə sədri Mehdiyev Gəncəli, Mingəçevir şəhər bölməsinin sədr müavini Nəsibov Aydın onlara göstərilən diqqət və qayğıya görə AzQAC-ın prezidenti cənab Novruz Aslanova öz dərin təşəkkürlərini bildirdilər. Onlar yekdilliklə AzQAC-ın 100 illiyi ərəfəsində çalışdıqlarına görə özlərini xoşbəxt hiss etdiklərini bildirdilər. AzQAC-ın bundan sonra da inkişafında əllərindən gələni əsirgəməyəcəklərini söylədilər.
Sonda təltif edilənlərlə birlikdə xatirə şəkli çəkdirildi.
