21 sentyabr – Beynəlxalq sülh günüdür | Azərbaycan Qızıl Aypara Cəmiyyəti

BMT bu günü 1981-ci ildə təsis edib. İlk sülh günü 1981-ci ilin sentyabrında qeyd olunub. O vaxtdan Beynəlxalq Sülh günü sentyabr ayının hər 3-cü çərşənbə axşamı qeyd edilirdi. Lakin 2001-ci ildə Birləşmiş Kralıq tərəfindən təklif olunan qətnamə ilə 2002-ci ildə BMT Sülh günü üçün 21 sentyabr tarixini dəqiq tarix kimi müəyyənləşdirib və bu tarixi ümumdünya atəşkəs günü elan edib.

Beynəlxalq Sülh günü BMT-nin Nyu-Yorkdakı Baş Qərargahında yerləşən “Sülh Zəngi”nin çalınması ilə başlayır. Yaponiya Parlamentinin hədiyyəsi olan bu zəngin üzərində “Yaşasın Mütləq Dünya Sülhü” sözləri yazılıb. Elə 2007-ci ildə BMT-nin Baş katibi Pan Gi Mun həmin “Sülh Zəngi”ni çalaraq dünyanı bütün döyüş əməliyyatlarını, ədavəti 24 saat ərzində dayandırmağa və bir dəqiqəlik sükuta çağırmışdı. Baş katib “Sülh bizim missiyamızdır; gündəlik axtarışlarımızın mövzusudur” deyə builki müraciətində də dünya ictimaiyyətini sülhə nail olmaq üçün bütün səyləri birləşdirməyə çağırır. Qeyd edək ki, silahların susmasına və qeyri-zorakılığa həsr olunan Beynəlxalq Sülh gününün bu iki mövzusu diqqəti daha çox aktual sülh və demokratiya məsələsinə cəlb edir.

Bu gün qüdrətli və güclü orduya malik Azərbaycan və onun Prezidenti, Ali Baş Komandan İlham Əliyev də xalqın sülh arzusunu ifadə edərək, münaqişənin sülh yolu ilə, qan tökülmədən, beynəlxalq hüquq çərçivəsində həlli istiqamətində əməli işlər görür… Sülhün qorunması, insanların əmin-amanlıqda yaşaması, amansız müharibələrin, hər çür zorakılığın dayandırılması arzusu bütün tarix boyu bəşəriyyəti düşündürür.

Belə ki, 21 sentyabr 2015-ci il tarixdə Qızıl Aypara Cəmiyyətinin Gənclər və Könüllülər şöbəsi 46 saylı Məktəbdənkənar Tərbiyə İşi Mərkəzi ilə birlikdə həmin mərkəzdə Beynəlxalq Sülh günü münasibətilə tədbir keçirtmişdilər. İlk əvvəl dünyada münaqişə zamanı həyatını itirən insanların xatirəsi bir dəqiqəlik sükutla yad edildi. Tədbir boyu həmin tərbiyə mərkəzində təhsil alan uşaqların sülh mövzusunda rəsm sərgiləri nümayiş etdirildi, şeirlər söylənildi, müxtəlif kompozisiyalar göstərildi.Tədbir iştirakçıları isə bu mövzuda öz fikirlərini söylədilər.

Tədbirdə Gənclər və Könüllülər şöbəsi, Gənclər Komitəsi, Sağlamlıq və Qayğı şöbəsi, Yayım sektorunun əməkdaşları iştirak etmişdilər.