Oktyabrın 1-də Beynəlxalq Qızıl Xaç və Qızıl Aypara Cəmiyyətləri (BQX/QAC) Federasiyasının Avropa zonası üzrə vitse-prezidenti, Türkiyə Qızıl Ay Cəmiyyətinin prezidenti Kərəm Kınık AzQAC-ın prezidenti Novruz Aslanova zəng edərək son günlər Dağlıq Qarabağ ərazisində Ermənistan silahlı qüvvələrinin təxribatı nəticəsində baş verən silahlı qarşıdurmanın mülki əhali də daxil olmaqla insan tələfatı ilə bağlı rahatsız olduğunu bildirmişdir. Bununla bərabər, Kərəm Kınık bu ağır vəziyyətdə həmişə olduğu kimi, AzQAC-a istənilən formada humanitar yardım göstərməyə hazır olduğunu Novruz Aslanovun diqqətinə çatdırmışdır. Belə çətin bir zamanda dost, qardaş diqqəti göstərərək zəng etməsini və mənəvi dəstək verməsini, həm də humanitar yardım göstərmək istəyinin olmasını yüksək  dəyərləndirən  Novruz Aslanov Kərəm Kınıka AzQAC-ın üzvlərinin və kollektivinin təşəkkürünü bildirmişdir. Novruz Aslanov qeyd etmişdir ki, Ermənistan silahlı qüvvələri intensiv olaraq yaşayış məntəqələrimizi, mülki əhalini və mülki obyektləri hədəfə almışdır. İlk gündən AzQAC-ın yerli bölmə əməkdaşları, mobil könüllü dəstələri mülki şəxslərin təxliyyəsində, yaralılara köməklik göstərilməsində və digər işlərdə fəallıq nümayiş etdirmişlər. Novruz Aslanov müəyyən qiymətləndirmə işlərinin aparılmaısndan sonra lazım olacaq yardımlarla bağlı məlumatları Türkiyə Qızıl Aypara Cəmiyyətinin prezidenti Kərəm Kınıka təqdim edəcəyini bildirmişdir.

Sonra Novruz Aslanovla Kərəm Kınık arasında Cəmiyyətin fəaliyyəti ilə bağlı fikir mübadiləsi aparılmışdır.