Dağlıq Qarabağ münaqişəsinin son eskalyasiyası regionda yaşayan mülki şəxslərin həyatına əhəmiyyətli dərəcədə təsir etmişdir. Minlərlə insan öz evlərini tərk etmiş  və qazanc yerlərini itirmişlər. Əsas infrastruktur və sosial xidmət obyeklərinə ciddi ziyan dəyib. Təsirlənmiş əhalinin humanitar ehtiyaclarını qarşılamaq məqsədilə Beynəlxalq Qızıl Xaç Komitəsi (BQXK), ölkədə fəaliyyət göstərən digər Beynəlxalq Qızıl Xaç və Qızıl Aypara Hərəkatı üzvü ilə koordinasiya şəraitində Azərbaycan Qızıl Aypara Cəmiyyətinə dəstək göstərməyə davam edir.

Azərbaycan Qızıl Aypara Cəmiyyətinin könüllüləri, Milli Cəmiyyətin rayon bölmələrinin nəqliyyat vasitəsi və avadanlıq ilə bağlı üzləşdikləri məhdudiyyətlərinə baxmayaraq, münaqişədən təsirlənmiş mülkilərə yerlərdə humanitar yardım göstərən ilk şəxslər idi. BQXK, əməkdaşlıq və tərəfdaşlıq dəyərlərinə riayət edərək Azərbaycan Qızıl Aypara Cəmiyyətinin əməliyyat bacarıqlarını genişləndirmək məqsədilə 11 avtomobil ianə etmişdir. Belə ki, münaqişədən təsirlənmiş icmalara birinci yollananlar arasında olan rayon bölmələrinə 10 pik-ap, Bakı şəhərindəki başqərargaha isə 1 avtomobil verilmişdir.

“Yol şəraitinə görə bir çox kəndlərə çatmaqda çətinlik çəkirdik. Bu avtomobil işimizi mütləq asanlaşdıracaq”, AzQAC-nın Ağdam rayon bölməsinin sədri ianə barəsindəki fikirlərini bölüşür. “Biz artıq daha çox yerlərə çata və eyni vaxtda daha çox yardım göstərə bilərik.”

Hər bir rayon bölməsinin fövqəladə hallara hazırlıqlı olması üçün onlara, həmçinin fövqəladə hallar üçün nəzərdə tutulmuş dəstlər də verilmişdir.

Biz, Dağlıq Qarabağ münaqişəsinin son eskalyasiyasının humanitar nəticələrindən əziyyət çəkən mülki şəxslərin ehtiyaclarını qarşılamaq məqsədilə Beynəlxalq Qızıl Xaç və Qızıl Aypara Hərəkatından olan tərəfdaşlarımızla əməkdaşlıq və koordinasiya fəaliyyətlərini davam etdiririk.