Hər il ənənəvi olaraq 20 oktyabr- 20 noyabr tarixlərində BMT-nin Uşaq Hüquqları Konvensiyasının qəbul edilməsinin ildönümü ərəfəsində Azərbaycanda “Uşaq hüquqları aylığı” elan edilir. Bu il ölkəmiz tərəfindən ratifikasiya edilmiş Konvensiyanın qəbul edilməsindən 26 il ötür. Bu münasibətlə digər təşkilatlar kimi Azərbaycan Qızıl Aypara Cəmiyyəti Sumqayıt şəhər bölməsi də maarifləndirici tədbir təşkil etmişdir.
5 noyabr 2015-ci il tarixində Fövqəladə Hallar Nazirliyi Sumqayıt Regional Mərkəzi və Azərbaycan Qızıl Aypara Cəmiyyəti Sumqayıt şəhər bölməsinin birgə təşkilatçılığı ilə “Uşaq hüquqları aylığı” çərçivəsində Sağlamlıq imkanları məhdud olan uşaqlar üçün xüsusi tipli internat məktəbində “Uşaqlar bizim gələcəyimizdir!” adlı tədbir keçirilmişdir. Tədbiri giriş sözü ilə məktəbin direktoru Ayət Kərimova açaraq gələn qonaqları salamlamış və sözü AzQAC Sumqayıt şəhər bölməsinin sədri Mətanət Məhərrəmovaya təqdim etmişdir. Mətanət xanım öz çıxışında uşaq hüquqlarından söz açaraq, uşaqları bu gün münasibəti ilə təbrik etmiş və hər kəsi uşaq hüquqlarından bəhs edən qısa videoçarxı izləməyə dəvət etmişdir. Daha sonra bölmənin təlimatçısı Tanrıverdiyeva Gülnar Uşaq Hüquqları Konvensiyası barədə məlumat vermiş və uşaqların hüquqlarından danışmışdır. Bundan sonra AzQAC Sumqayıt bölməsinin Sağlamlıq imkanları məhdud olan uşaqlar üçün xüsusi tipli internat məktəbində keçirdiyi çoxsaylı tədbirlərdən həvəskar şairə Gülnur Aslanın sözlərinə bəstələnmiş “Qoruyaq uşaqları” mahnısının sədaları altında hazırlanmış slaydı təqdim etmişdi. Rəsmi hissədə FHN Sumqayıt Regional Mərkəzinin əməkdaşı tədbir iştirakçılarına təhlükəsizlik qaydalarından bəhs etmişdir.
Tədbirin bədii hissəsində internat məktəbinin şagirdləri şeirlər söyləmiş, müxtəlif rəqslərlə çıxış etmiş, xor qrupu gözəl mahnılar səsləndirmişdi. Tədbirin sonunda xatirə şəkilləri çəkilmişdir.
