26 may 2023-cü tarixdə Azərbaycan Qızıl Aypara Cəmiyyətinin prezidenti, Milli Məclisin deputatı Novruz Aslanov AzQAC-ın Sumqayıt şəhər bölməsinin Fövqəladə Mobil Könüllü Dəstənin üzvlərini AzQAC-ın baş ofisində qəbul edib. Görüşdə AzQAC-ın İcraçı katibinin müavini Elşən Səlimzadə və Gənclər və Könüllülər şöbəsinin müdiri Xalidə İskəndərova da iştirak ediblər.
Görüşü giriş sözü ilə açan Novruz Aslanov könüllüləri salamlayaraq, onları Cəmiyyətdə görməyindən məmnun olduğunu bildirib. Görüşün məqsədini və əsas istiqamətlərini qeyd edən Novruz Aslanov, humanitar diplomatiyanın vacibliyindən və AzQAC-ın fəlsəfəsindən bəhs edib. Daha sonra o, 1995-ci ildən bu günədək Milli Cəmiyyətdə könüllü kimi fəaliyyətindən danışaraq, könüllülük fəaliyyətinin humanitar diplomatiyadakı rolu və əhəmiyyətindən söhbət açıb. Novruz Aslanov hazırda Cəmiyyətin bir çox könüllülərinin xarici şirkətlərdə Milli Cəmiyyətimizin səfirləri kimi fəaliyyət göstərdiklərini vurğulayıb və tədbirdəki könüllülərin timsalında Cəmiyyətin bütün çoxsaylı könüllü üzvlərini Cəmiyyətimizi və ölkəmizi xaricdə layiqincə təmsil etməyə çağırıb.
Daha sonra AzQAC-ın Sumqayıt şəhər bölməsinin sədri Mətanət Məhərrəmova Milli Cəmiyyətin prezidenti Novruz Aslanovu və iştirakçıları salamlayaraq, AzQAC-ın Sumqayıt şəhər bölməsinin Fövqəladə Mobil Könüllü Dəstənin üzvləri adından Cəmiyyətin prezidentinə daimi dəstək və motivasiyaya görə dərin təşəkkürünü bildirdi. O, AzQAC-ın Sumqayıt şəhər bölməsinin fəaliyyətindən, təhsil ocaqlarında təşkil etdiyi seminarlar, aksiyalardan və bölmədəki sistematik fəaliyyətdən danışıb.
Sonra AzQAC-ın prezidenti Novruz Aslanov və könüllülər FHN-nın keçirdiyi təlimdən könüllülərin fəal iştirakını əks etdirən video görüntülərə baxıblar.
Ardınca könüllülər görüşün təşkilatçılarına öz təşəkkürlərini bildirib və Cəmiyyətdəki fəaliyyətləri haqqında danışıblar.
Yekun olaraq dövlətin AzQAC-ın fəaliyyətinə verdiyi qiymət və dəstəyi vurğulayan Novruz Aslanov könüllüləri Fövqəladə Hallar Nazirliyinin yanğın xilasetmə qurumlarının və Azərbaycan Qızıl Aypara Cəmiyyətinin əməkdaşlarının iştirakı ilə Ümummilli Lider Heydər Əliyevin anadan olmasının 100 illiyinə həsr olunmuş “Bir hadisənin qarşısını almaq, o hadisə baş verəndən sonra onun nəticələrini aradan qaldırmaqdan daha asandır” şüarı altında əməliyyat-taktiki təlimlərin keçirilməsində fəal iştirak etdiklərinə görə təşəkkürnamə ilə təltif edib.
Sonda kollektiv xatirə şəkili çəkilib.
