Azərbaycan Qızıl Aypara Cəmiyyətinin və İran Qızıl Aypara Cəmiyyətinin Bakıdakı Klinikasının rəhbər şəxsləri və nümayəndələrinin iştirakı ilə Cəmiyyətin baş ofisində baş tutan görüşdə giriş sözü ilə çıxış edən AzQAC-ın vitse prezidenti Qafar Əsgərzadə Cəmiyyətin prezidenti, Milli Məclisin deputatı cənab Novruz Aslanovun salamalarını və təşəkkürlərini Klinikanın nümayəndə heyətinə çatdırdı. Vitse prezident çıxışında İran Qızıl Aypara Cəmiyyəti, eləcə də, Bakıda fəaliyyət göstərən klinikası ilə olan əməkdaşlıqdan məmnunluq hissi duyduğunu ifadə etdi. Humanitar sahədə hər iki qurum arasındakı əlaqələrin artan dinamika ilə inkişaf etdiyini söyləyən natiq son zamanlar dünyəvi problemə çevrilmiş COVİD-19 virusu ilə mübarizədə İran Qızıl Aypara Klinikasının da xüsusi dəstəyinin olduğundan və bu sahədə mühüm işlər gördüyündən bəhs etdi.
Daha sonra çıxış edən İran Qızıl Aypara Klinikasının Baş həkimi Seyid Kənani onlara göstərilən diqqət və qayğıya görə AzQAC-ın rəhbərliyinə öz təşəkkürlərini bildirdi. Dünyəvi bəlaya çevrilən virusun qarşısının alınmasında respublikada dövlət səviyyəsində aparılan işlərin, görülən profilaktik tədbirlərin müsbət nəticəsindən bəhs etdi. AzQAC-ın bu sahədə dövlətə yardımçı olduğunu da xüsusi qeyd edən Seyid Kənani, həmçinin, xüsusi karantin dövründə klinikanın daim açıq saxlanılaraq vətəndaşlara yüksək xidmət göstərdiklərini də önə çəkdi. Klinikaya müraciət edənləri cavabsız qoymadıqlarından, bu sahədə görülən təmənnasız xidmətlərdən bəhs etdi. Humanitar sahədə gələcəkdə də AzQAC-a daim dəstək olacaqlarını vurğuladı.
Sonda İran Qızıl Aypara Klinikası nümayəndələri Azərbaycan Qızıl Aypara Cəmiyyətinə COVİD-19 virusu mübarizədə 5000 tibbi maska ianə etdi.
Tibbi maskalar könüllülər vasitəsilə ehtiyacı olan insanlara paylanılacaq. 
