Dekabr ayının 1-də Azərbaycan Qızıl Aypara Cəmiyyətinin baş ofisində Türk İşbirliyi və Koordinasiya Agentliyinin Bakı nümayəndəliyinin rəhbəri cənab Teoman Tiryaki ilə görüş keçirildi. Görüşü giriş sözü ilə açan Cəmiyyətin vitse-prezidenti Qafar Əsgərzadə qonaqları salamlayaraq Cəmiyyətin prezidenti, Milli Məclisin deputatı Novruz Aslanovun salamlarını və xoş arzularını diqqətə çatdırdı. Daha sonra natiq çıxışında AzQAC-la TİKA arasında mövcud əməkdaşlıq əlaqələrindən, COVİD-19 pandemiyası ilə mübarizə çərçivəsində ehtiyaclı insanlara ərzaq bağlamaları və gigiyenik məmulatla yardım göstərilməsindəki, eləcə də, döyüş bölgəsində zərərçəkənlərə yardım göstərilməsi ilə əlaqədar ilk yardım çantaları ilə təmin olunması sahəsindəki işini xüsusi qeyd edərək, bir daha bu xeyirxah humanitar aksiyaya görə Cəmiyyətin rəhbərliyi və kollektivi adından təşəkkürünü bildirdi.

Qafar Əsgərzadə qonaqların nəzərinə çatdırdı ki, artıq Dağlıq Qarabağ ərazisindəki torpaqlarımız işğaldan azad olunmuşdur. Qayıdışla bağlı bütün səviyyələrdə müxtəlif tədbirlər planı hazırlanır. Düşünürük ki, TİKA ilə əməkdaşlıq çərçivəsində həmin ərazilərdə Azərbaycan Qızıl Aypara Cəmiyyətinin yerli bölmələrinin yeni ofis binalarının inşaası, onların zəruri avadanlıq və texnika ilə təminatı daha məqsədəuyğun olar. Bununla əlaqədar birgə layihələrin hazırlanması və həyata keçirilməsinə böyük zərurət vardır.

Cəmiyyətin prezidentinin fövqəladə hallara hazırlıq və cavabvermə üzrə müavini Elşən Səlimzadə bu layihələrin hazırlanması və həyata keçirilməsi ilə bağlı malik olduğu illərin təcrübəsini qonaqlarla bölüşdü.

TİKA-nın rəhbəri xoş sözlərə, eləcə də, dəvətə görə dərin minnətdarlığını bildirdi. Daha sonra natiq Cəmiyyətin vitse-prezidenti Q.Əsgərzadənin səsləndirdiyi təkliflərə öz münasibətini bildirərək, gələcəkdə bu layihələrin nəzərdən keçirilməsinin mümkünlüyünü vurğuladı.

Sonra bu və ya digər məsələlər ətrafında fikir mübadiləsi aparıldı.