7-9 dekabr 2022-ci il tarixində Naftalan şəhərində Fövqəladə Mobil Könüllü Dəstələrin (FMKD) üzvləri üçün “Komanda quruculuğu və Liderlik” tədbiri təşkil olunub. Tədbirin əsas məqsədi Dünya Könüllülər Gününü qeyd etmək, FMKD könüllülərinin işini qiymətləndirmək və könüllülərin tematik mövzularda bilik və bacarıqlarını artırmaq idi.
Tədbirin gündəliyinə könüllülərin bilik və bacarıqlarının artırılmasına dəstək olmaq məqsədilə liderlik və kommunikasiya sessiyaları, təcrübə mübadiləsi, müxtəlif oyunlar və qrup işləri daxil idi. Tədbir zamanı könüllülər qeyri rəsmi yığıncaqda işitrak edib, Beynəlxalq Könüllülər Gününü də qeyd etmə imkanı əldə ediblər. Onlar eyni zamanda, rayon bölmələrinin 2022-ci il fəaliyyətlərini əks etdirən təqdimatlar ediblər.
3 gün davam edən tədbirdə Azərbaycan Qızıl Aypara Cəmiyyətinin (AzQAC) Sumqayıt, Ağdam, Füzuli, Qazax, Tovuz, Bərdə, Cəbrayıl və Tərtər rayon bölmələrindən ümumilikdə 33 könüllü iştirak edib.
Tədbirin son günündə könüllülərin iştirakı ilə İlk Yardım üzrə simulyasiya məşğələsi keçirilib. Müvafiq ssenari üzrə könüllülər zərərçəkmişlərə ilk yardım göstərib və onları ərazidən təxliyyə ediblər. Məşğələnin sonunda könüllülərlə brifinq keçirilib, onların məşğələyə aid təəssüratları soruşulub.
