12 dekabr xalqımızın Ümummilli lideri, Azərbaycan tarixində misilsiz xidmətləri ilə əbədiyaşar mövqe qazanmış, həmçinin, AzQAC-ın tarixində silinməz iz buraxmış Ulu öndər və Azərbaycan Qızıl Aypara Cəmiyyətinin Fəxri Üzvü Heydər Əliyevin anım günüdür.

Ulu öndər Heydər Əliyevin dəstəyi, diqqət və qayğısı ilə AzQAC-ın fəaliyyətinin gücləndirilməsi məqsədilə bir sıra Sərəncam imzalanmış, qanunlar qəbul edilmiş, Azərbaycan Qızıl Aypara Cəmiyyəti beynəlxalq aləmdə tanınan təşkilata çevrilmişdir. Azərbaycan Respublikası müstəqillik əldə etdikdən sonra, məhz Ulu Öndər Heydər Əliyevin təşəbbüsü ilə 1994-cü il 25 noyabr tarixində Azərbaycan Respublikasının Milli Məclisi yeganə müstəqil, neytral, vahid humanitar təşkilat olan Azərbaycan Qızıl Aypara Cəmiyyətini ölkədə Beynəlxalq Qızıl Xaç və Qızıl Aypara Hərəkatının yeganə üzvü kimi rəsmən tanımışdır.

Bu gün 102 illik şanlı tarixi inkişaf yolu keçmiş Azərbaycan Qızıl Aypara Cəmiyyətinin prezidenti, Milli Məclisin deputatı cənab Novruz Aslanov başda olmaqla, AzQAC rəhbərliyi, çoxsaylı kollektivi, üzvləri və könüllüləri bu dahi şəxsiyyətə öz dərin hörmət və ehtiramını bildirmək üçün “Fəxri Xiyaban”-da onun məzarını ziyarət etmiş, abidəsi önünə çiçəklər düzmüş, ruhuna dualar oxumuşlar.