12-14 Sentyabr 2022-ci il tarixlərində Azərbaycan Qızıl Aypara Cəmiyyəti və Beynəlxalq Qızıl Xaç və Qızıl Aypara Cəmiyyətləri Federasiyanın Azərbaycandakı Nümayəndəliyinin Nağd Pul və Vauçer Yardımı (NPVY) üzrə məsul şəxslərinin birgə təşkilatçılığı ilə 5 bölgə üzrə – Füzuli, Saatlı, İmişli, Lənkəran və İsmayıllı rayonlarının AzQAC bölmələrində və İcra Hakimiyyətlərində qeydiyyatda olan ehtiyaclı insanlar arasında sorğu aparılmışdır. Sorğu AzQAC tərəfindən gələcəkdə həyata keçirilə biləcək nağd pul yardımı layihəsi üçün seçilmiş bölmələrdə insanların ehtiyaclarını ölçmək, nağd pul yardımı ilə bağlı düşüncələri və Covid-19 pandemiyasının insanların yaşayışına göstərdiyi təsiri müəyyən etmək məqsədi daşıyırdı. NPVY üzrə yaradılmış xüsusi könüllü qrupunun 10 üzvünün dəstəyi ilə Bakı şəhərində uzaqdan aparılan sorğular 3 gün davam etmiş və 503 nəfərə zəng edilmişdir. 45 sualdan ibarət sorğunun nəticələri üzərində qiymətləndirmə aparılacaq və gələcəkdə həyata keçiriləcək NPVY layihələrinə daha yaxşı hazırlıqlı olmaq üçün tədbirlər görüləcəkdir. Bu fəaliyyət yalnız sorğu aparmaq məqsədi daşıyır və sorğuda iştirak edən insanlara hər hansı bir yardımın verilməsinə zəmanət vermir.