5-6 dekabr tarixlərində Azərbaycan Qızıl Aypara Cəmiyyəti Azərbaycan Respublikası Dövlət Miqrasiya Xidmətinin əməkdaşları üçün 2 günlük İlk Yardım təlimi həyata keçirib.

Təlimin ilk günündə açılışı Dövlət Miqrasiya Xidmətinin Miqrasiya siyasəti və hüquqi təminat baş idarəsinin rəis müavini Kəyan Hacıyev və Azərbaycan Qızıl Aypara Cəmiyyətinin Miqrasiya şöbəsinin müdiri Məmməd Kətanov etdi. Kəyan Hacıyev iki qurum arasında yaxın əlaqələrdən, gələcəkdə həyata keçiriləcək mümkün qarşılıqlı əməkdaşlıqlardan və ümumilikdə İlk Yardım təliminin nə qədər önəmli və həyati bir təlim olduğunu vurğulayıb. AzQAC-ın Miqrasiya şöbəsinin müdiri Məmməd Kətanov da öz növbəsində təlimə qatılanları salamlayıb və AzQAC-ın prezidenti, Milli Məclisin deputatı Novruz Aslanovun salamını ünvanlayıb. Daha sonra Məmməd Kətanov AzQAC-ın miqrantlara göstərdiyi dəstəkdən, miqrantlar üçün təşkil etdiyi təmannasız Azərbaycan və İngilis dili kursları, onların bütün sosial və hüquqi məsələlərinə də verilən dəstəyi vurğulayıb. Həmçinin İlk Yardım təlimlərinin əhəmiyyətini və növbəti ildən etibarən qarşılıqlı əməkdaşlıq çərçivəsində bu təlimin yenidən həyata keçirilməsini də vurğulayıb.

2 günlük İlk Yardım təlimi Dr. Şahin Biləndəri tərəfindən həyata keçirilib. 26 nəfər təlim iştirakçısı həm nəzəri, həm də praktiki olaraq İlk Yardım mövzusu üzrə nəzəri və praktiki biliklər mənimsəmişdirlər. Təlimin həyata keçirilməsinə görə Dövlət Miqrasiya Xidmətinin rəhbərliyi AzQAC-ın prezidenti, Milli Məclisin deputatı cənab Novruz Aslanova dərin minnətdarlığını bildirmişdir. Təlimin sonunda isə iştirakçılara AzQAC tərəfindən İlk Yardım üzrə sertifikatlar təqdim olunub.