30 may 2023-cü ildə Milli Məclisin sədri xanım Sahibə Qafarova AzQAC-ın prezidenti, millət vəkili Novruz Aslanova I dərəcəli “Vətənə xidmətə görə” ordenini təntənəli surətdə təqdim edib.
Sahibə xanım Qafarova öz çıxışında respublikanın ictimai-siyasi həyatında fəal iştirak edən Novruz Aslanovun parlamentdəki fəaliyyətini də yüksək qiymətləndirib, üzvü olduğu aqrar siyasət və mədəniyyət komissiyalarının işində məhsuldar əməyinin dəyərləndirildiyini, Ümummilli lider Heydər Əliyevin 100 illik yubileyinə həsr olunmuş filmin müsiqi tərtibatının Novruz Aslanova məxsus olduğunu, həmçinin, bu təltiflərin ümumilikdə Milli Məclisə verilən qiymət olduğunu bildirib.
Novruz Aslanov söz alaraq bu yüksək təltifə görə dövlət başçısına təşəkkürünü bildirib.
Belə bir tədbirin keçirilməsinə və ünvanına səsləndirilən xoş sözlərə görə Sahibə xanım Qafarovaya və Milli Məclisin rəhbərliyinə minnətdarlığını vurğulayıb. Bunun böyük bir məsuliyyət olduğunu bildirən Novruz Aslanov, bundan sonra da dövlətin həyata keçirdiyi uğurlu siyasətində fəal iştirak edəcəyini, dövlətə və onun rəhbərliyinə sədaqətlə xidmət göstərəcəyini və cənab Prezidentin siyasətinin yerlərdə icrasında və yerli ictimaiyyət arasında təbliğində səylərini davam etdirəcəyini söyləyib.