30 aprel 2018-ci il tarixində İsmayıllı rayonu Peşə Tədris Mərkəzində geniş səpkili görüş kecirilmişdi.
Görüşün məqsədi 8 may Beynəlxalq Qızıl Xac Qızıl Aypara Hərəkatının yaranması günü münasibəti ilə “Təhlükəsiz və möhkəm icmaların qurulması” layihəsi (TMİQ) cərcivəsində, Fövqəladə Hallar Nazirliyi və Azərbaycan Qızıl Aypara Cəmiyyəti (AzQAC) arasında imzalanmış Əməkdaşlıq Memorandumu əsasında planlaşdırılmış simulyasiya təlim-məşqinə birgə hazırlıq işlərinin müzakirəsi idi.
Qeyd etmək lazımdır ki, adı çəkilmiş tədbirlə bağlı artıq AzQAC-ın Baş Qərargahı nəzdində işçi qrupu yaradılmış, ilkin vəzifə bölgüləri aparılmış və növbəti addımlar müəyyənləşdirilmişdir.
Hazırlıq işlərinin və planlaşdırılmış addımların davamı olan görüşdə İsmayıllı rayon İcra hakimiyyətinin I müavini Fövqaladə Hallar komissiyasının sədri Rövşən Ağayev, FHN-nin Baş Əməliyyat İdarəsinin mütəxəssisi Namik Abdullayev, FHH Qəbələ Regional Mərkəzinin əməkdaşları, Şimal-qərb Regional Mərkəzinin Mülki Müdafiə şöbəsinin rəisi Eldəniz Mehdiyev, Xüsusi riskli xilasetmə şöbəsinin rəisi Elvin Qocayev və AzQAC tərəfindən cəmiyyətin prezidentinin müşaviri, TMİQ layihə koordinatoru Elşən Səlimzadə, İcracı katibin müavini Xalidə İsgəndərova, AzQAC Sumqayıt Regional Mərkəzinin koordinatoru Mətanet Məhərrəmova iştirak edirdilər.
Eyni zamanda görüşün iştirakçıları tərəfindən təlim-məşq yerinə baxış kecirilmiş və iştirakcı qurumlar arasında lazımi tapşırıq bölgüsü aparılmışdır.
Beynəlxalq müşahidəçilərin iştirak edəcəyi bu geniş səpkili təlim-məşqində hər iki qurumun tərəfindən yaranmış fövqəladə hallar zamanı tətbiq edilməsi lazım olan müvafiq bacarıq və biliklərin nümayiş etdirilməsi imkanı yaradılacaqdır.
Yuxarıda qeyd olunan TMİQ layihəsi Azərbaycanın İsmayıllı və Qusar rayonlarında Avstriya İnkişaf və Əməkdaşlıq Agentliyi, Avstriya Qızıl Xaç Cəmiyyətinin maliyyə və texniki dəstəyi, İsmayıllı və Qusar rayonlarının İcra hakimiyyətləri və kənd bələdiyyələrinin dəstəyi, yerli icmaların fəal iştirakı ilə 2012-ci ildən bu vaxta qədər uğurla həyata keçirilir.
